Unter de heisse Obigssunne ufem AirBnB-Balkon mit Blick uf’s Meer und ere dreihte Zigi im Muul machemer de Chianti uf. Links und rechts vor uns erstreckt sich es Muster us gstreifte Sunneschrim, nebedra türme sich d’Hotel mit ihrne All-Inclusive-Buffet und Privatswimmingpools und mir fühle uns krass, mir fühle uns besser, will mir es AirBnB gmietet hend und uns im Schiin vomne «nochhaltige» Tourismus lönd loh brüne. 

Morn gömmer hei – mitem Zug, nid wohr – und chönne denn uf de Los-Rubbel-Oberfläche vo de uf Amazon kaufte Weltcharte es wiiters Land uschratze. Mir sind jung, mir sind überall, mir erobere ganz nach unserne eigene moralische Massstäb und wiege uns in guetem Gwüsse.